|
|
VEPSÄN ÜLÄOPENIKAD PITERIŠ
 |
Vepsän üläopenikad Venän Valdk. Pedagogižes Universitetas |
Venän Valdk. Pedagogižes Universitetas Piteriš om üläopenikoid Piterin agjaspäi, kudambad opendase erazvuiččiš tedokundoiš. No hö voiba opendaba meiden kel't officialižikš vaiše Edahaižen Pohjoižen Rahvhiden Tedokundas. Ezmäižen kursan üläopenikoid-neiččid om nell', toižen kursan openikoid – koume; kaks' heišpäi – nored mehed i üks' – neižne. Vepsän kelen opendajan radab Sergei Miznikov, Piterin Vepsän Sebran varapämez' i lujas tutab kelentedaimez'.
Tetpas, üläopenikoil ei olend hüväd paginpraktikad, sikš miše heiden vanhembad ei pagižend heidenke vepsäks. Pidab sanuda, miše heiden paginvaihišt-ki om lujas goll', no üks-se heiden hüvä openduz täutab meid todesižel optimizmal.
Openduzkabinetas om erazvuiččid kirjoid vepsän kirjankelel, i nene kirjad, kut "Kodima"-lehtesen nomerad-ki kaiken ottas radho. Üläopenikad saba tedoid kut kirjankeles, muga vepsän tahopaginoiš-ki, hö äjan lugeba vepsäks.
Tedokund varastab uzid abiturientoid vepsän külišpäi, i meiden Sebr voib rekomenduida heid opendamižen täht da abutada heile udes lidnalaižes elos i openduses. Ku kelle-ni noriš vepsläižišpäi tegeb mel' tulda opendamhas Piterhe, ka kirjutagaha meile: 199226, Naličnaja ird, 36–3–265, Piter, Brodskin I. Meiden kontakttelefon: (812)3563196, e-mail: kodima@mail.ru
I. Brodski
|
Vepsän üläopenikad Piterin Tehnologian da Dizajnan Universitetas |
Tehnologian da Dizainan Universitetas Piteriš opendase sur' grupp vepsläižid üläopenikoid Karjalaspäi – Petroskoišpäi, Vepsän Rahvhaližes Makundaspäi i toižiš necen valdkundan tahoišpäi. Erased heišpäi tuleskeleba vepsän kelen urokoile Pedagogižehe Universitetha, i nece openduz om ani maksutoi. Meiden Sebr ühtes Karjalan Rahvhaližen Politikan Laudkundanke tegeb kaik, miše nene-ki üläopenikad openuižiba meiden kelt.